ფინანსთა სამინისტროს საგამოძიებო სამსახურის უფროსი სოსო რამიშვილი იტალიის რესპუბლიკის საელჩოს საბაჟოს, გადასახადების, აქციზების, ფულის გათეთრებისა და ტერორიზმის დაფინანსების წინააღმდეგ ბრძოლის საკითხთა ატაშეს, იტალიის რესპუბლიკის ფინანსური გვარდიის წარმომადგენელს, კლაუდიო რამპონის და კომერციულ ატაშეს, მასიმო მარიანის შეხვდა.

როგორც „ინტერპრესნიუსს“ ფინანსთა სამინისტროს საგამოძიებო სამსახურიდან აცნობეს, გაცნობითი ხასიათის შეხვედრაზე ორი ქვეყნის კოლეგა უწყების - ფინანსთა სამინისტროს საგამოძიებო სამსახურის და იტალიის რესპუბლიკის ფინანსური გვარდიის საქმიანობის ძირითადი მიმართულებები დეტალურად განიხილეს. საუბარი შეეხო სამომავლო თანამშრომლობის ფორმატს და ძირითად მიმართულებებს.

როგორც საგამოძიებო სამსახურის უფროსმა სოსო რამიშვილმა აღნიშნა, ფინანსთა სამინისტროს საგამოძიებო სამსახურის ერთ - ერთი პრიორიტეტი საფინანსო-ეკონომიკურ დანაშაულთან ბრძოლის ევროპული მიდგომების, საუკეთესო პრაქტიკის და გამოცდილების გაზიარებაა. უწყება მზად არის გააღრმაოს ურთიერთობები და გაააქტიუროს თანამშრომლობა იტალიის რესპუბლიკის ფინანსურ გვარდიასთან.

შეხვედრაზე იტალიურმა მხარემ მზაობა გამოთქვა დაიგეგმოს შესაბამისი ღონისძიებები კონკრეტული მიმართულებებით თანამშრომლობის და პროფესიული პრაქტიკის გაზიარების მიზნით.

შეხვედრას საგამოძიებო სამსახურის უფროსის მოადგილეები, საგამოძიებო დეპარტამენტის და ადმინისტრაციის უფროსები ესწრებოდნენ.