“სალომე ზურაბიშვილი არ არის ლეგიტიმური პრეზიდენტი", - ამ მოწოდებით ქუთაისში გაერთიანებული ოპოზიციის წევრებმა აქცია გამართეს.
გაერთიანებული ოპოზიციის წევრები მერიის წინ შეიკრიბნენ და სიმბოლურად ხახვი და კარტოფილი მიიტანეს.
აქციის მონაწილეების თქმით, მათი მთავარი მოთხოვნა ვადამდელი საპარლამენტო არჩევნებია.
„დღეს თელავში დაგეგმილ აქციას ქუთაისიდანაც შეუერთდნენ მოქალაქეები. მათ, ვინც ვერ შეძლო აქციაზე წასვლა, შესაძლებლობა მივეცით ქუთაისშიც გამოხატონ პროტესტი. სალომე ზურაბიშვილი არაა ლეგიტიმური პრეზიდენტი, რადგან არჩევნები გაყალბდა. არ ვაღიარებთ მას, ამიტომ ვიკრიბებით და ვითხოვთ ვადამდელ საპარლამენტო არჩევნებს და პროპორციულ წესით არჩევნებს", -განაცხადა „ნაციონალური მოძრაობის" წევრმა გიგა შუშანიამ.
აქციის მონაწილეებმა მერიასთან ბიძინა ივანიშვილის და სალომე ზურაბიშვილის გამოსახულებით პლაკატები „არა სალომეს " გააკრეს.