აქციის მონაწილეებს შეუძლიათ ყვარლის შემოვლითი გზით ისარგებლონ და მოძრაობა აღნიშნულ მონაკვეთზე გააგრძელონ, - ამის შესახებ „ინტერპრენიუსს“ საპატრულო პოლიციის დეპარტამენტის უფროსმა თეიმურაზ კუპატაძემ განუცხადა.

კუპატაძის განცხადებით, ყვარლის შემოვლით გზაზე აქციის მონაწილეებს არანაირი პრობლემა არ შეექმნებათ, ვინაიდან მოძრაობას სრულად აკონტროლებს საპატრულო პოლიცია.

აღნიშნულის მიუხედავად, ოპოზიციის წარმომადგენლები და აქციის მონაწილეები კვლავ მუკუზანის შესასვლელთან რჩებიან და სამართალდამცავებს მოუწოდებენ გზის საავტომობილო მონაკვეთი გაათავისუფლონ.

აქციის რამდენიმე მონაწილემ საპატრულო პოლიციის მანქანების გადაწევა და გზის გაგრძელება სცადა, რის გამოც ჩამსხვრეულია ერთ-ერთი ავტობუსის შუშა, რომელიც შს სამინისტროს ბანლანსზეა და აღნიშნული ავტობუსით პოლიციას გზა აქვს გადაკეტილი.

შექმნილი ვითარებიდან გამომდინარე, ადგილზე საჭირო გახდა დამატებითი ძალების მობილიზება.