გურჯაანის „ჯეო ჰოსპიტალსის“ ექიმის, ლელა შალვაშვილის განცხადებით, მათ კლინიკაში ველისციხეში დაპირისპირებისას დაშავებული სამართალდამცავები და აქციის მონაწილეები შეიყვანეს. ექიმის განცხადებით, მათი მდგომარეობა სტაბილურია და მათ სიცოცხლეს საფრთხე არ ემუქრება.
„მათ შესაბამისი გამოკვლევები უტარდებათ. ნაწილმა უკვე დატოვა სტაციონარი. მიმდინარეობს პაციენტებზე დაკვირვება, აქედან ნაწილი ალბათ დარჩება სტაციონარში. დაზიანებები საშუალო სიმძიმისაა, ზოგიერთ აღენიშნება ქალა ტვინის დახურული ტრავმა, თავის ტვინის შერყევა და თავის ზედაპირული ტრავმა“, - განაცხადა ექიმმა.
შეგახსენებთ, რომ სალომე ზურაბიშვილის ინაუგურაციის პარალელურად გაერთიანებული ოპოზიცია თელავში აქციის გამართვას გეგმავდა, თუმცა სამართალდამცავების მიერ გზის გადაკეტვის გამო, მათ სოფელ ველისციხიდან თელავისკენ გზის გაგრძელება ვეღარ შეძლეს, რასაც აქციის მონაწილეებსა და პოლიციას შორის დაპირისპირება მოჰყვა. შედეგად, რამდენიმე ადამიანი დაშავდა.