საქართველოს პარლამენტის თავმჯდომარის მოადგილე, გიორგი ვოლსკი ბელარუს კოლეგას, ბელარუსის პარლამენტის თავმჯდომარის მოადგილეს, მარიანა სჩიოტკინას შეხვდა.

როგორც “ინტერპრესნიუსს“ პარლამენტიდან აცნობეს, მარიანა სჩიოტკინა გუშინ, თელავში გამართულ ახალარჩეული პრეზიდენტის, სალომე ზურაბიშვილის ინაუგურაციას დაესწრო. მან ბელორუსი ხალხის და ხელისუფლების სახელით კიდევ ერთხელ გადმოსცა მილოცვა გიორგი ვოლსკის.

საქართველოს პარლამენტის თავმჯდომარის მოადგილემ, ბელარუს კოლეგას მადლობა გადაუხადა. გიორგი ვოლსკიმ მადლიერება გამოხატა ასევე საქართველოს ტერიტორიული მთლიანობის მყარი მხარდაჭერისთვის, მისი კოლეგის და ბელარუსის ხელისუფლების პირველი პირების მიმართ.

პარლამენტის ინფორმაციით, შეხვედრაზე მხარეებმა ორ ქვეყანას შორის არსებული ურთიერთობები მიმოიხილეს.

მათივე ცნობით, აღინიშნა, რომ საქართველოსა და ბელარუსს შორის საპარლამენტო და სახელმწიფოთაშორისი ურთიერთობები დინამიურად ვითარდება, რასაც ორივე მხარე მიესალმა და აღნიშნულ თანამშრომლობას პოზიტიური შეფასება მიეცა.