ინციდენტების პრევენციისა და მათზე რეაგირების მექანიზმის ფარგლებში, ერგნეთში დღეს შეხვედრა განახლდება.

აღნიშნულ ფორმატში ბოლო შეხვედრა სექტემბერში ჩატარდა, თუმცა, რიგით 89-ე მოლაპარაკება დე ფაქტო ცხინვალის წარმომადგენლების მხრიდან პროტესტის ნიშნად ჩაიშალა და მას შემდეგ აღარ გამართულა.

ოკუპირებული ცხინვალის რეგიონის წარმომადგენლებმა დღის წესრიგიდან ახალგორის ტერიტორიაზე დაკავებული და შემდგომ მოკლული არჩილ ტატუნაშვილის და დავით ბაშარულის საკითხების ამოღება მოითხოვეს, ქართული დელეგაციის მხრიდან უარს კი უთანხმოება მოჰყვა, რაც სხდომის ჩაშლის მიზეზი გახდა.

დღევანდელი შეხვედრის შესახებ მხარეებს კომენტარები ჯერ არ გაუკეთებიათ, შესაბამისად, უცნობია დღის წესრიგი. ინციდენტების პრევენციის ფორმატში შეხვედრის დაწყება 12:00 საათამდეა დაგეგმილი.