პრეზიდენტ სალომე ზურაბიშვილის საპარლამენტო მდივნის, დიმიტრი გაბუნიას განცხადებით, სალომე ზურაბიშვილისთვის დეპუტატის მანდატის შეწყვეტის საკითხზე პარლამენტს დღეს მიმართავენ. ამის შესახებ ჟურნალისტებს დიმიტრი გაბუნიამ შესაბამის კითხვაზე პასუხისას განუცხადა.

„ჩვენ დღეს მივმართავთ პარლამენტს, პარლამენტის თავმჯდომარეს დეპუტატის უფლებამოსილების შეწყვეტის თაობაზე. ბუნებრივია, ეს პროცედურა გაწერილია საქართველოს კონსტიტუციაში და რეგლამენტში. არსად არ წერია, რა ვადაში უნდა მიმართოს კონკრეტულად პირმა უფლებამოსილების ვადაზე ადრე შეწყვეტის თაობაზე. აქედან გამომდინარე ჩვენ ვაპირებთ, რომ დღეს მივმართოთ და შესაბამისი პროცედურების გავლის მერე, საქართველოს პარლამენტის რეგლამენტით, ქალბატონ სალომეს შეუწყდება პარლამენტის უფლებამოსილება“, - განაცხადა გაბუნიამ.