მე პირადად, სუბიექტურად გეტყვით და ჩემი მეგობრებიც ალბათ, ამ აზრზე არიან, რომ სასამართლოსგან ობიექტურ გადაწყვეტილებას არ ველოდებით, რადგან საქართველოში მართლმსაჯულება არ არსებობს, - ამის შესახებ ჟურნალისტებთან საუბრისას ხატია დეკანოიძემ გურჯაანის რაიონულ სასამართლოსთან განაცხადა.

მისი თქმით, კირკიტაძის უფლებადამცველები ყველაფერს გააკეთებენ იმისთვის, რომ სასამართლომ ობიექტური განაჩენი გამოიტანოს. "ის ადამიანები, რომლებიც დათოს იცავენ, ყველაფერს გააკეთებენ და გავაკეთებთ იმისთვის, რომ ობიექტური განაჩენი დადგეს. ხელისუფლების უკანონო ქმედება მაშინ დაიწყო, როცა პოლიციამ უკანონოდ გადაკეტა გზა, ჩახერგა ავტობუსით, რომელსაც სიმბოლიკის არანაირი განმსაზღვრელი არ ჰქონდა, რომ ის მწვანე ავტობუსი პოლიციას ეკუთვნოდა. პოლიციის შესახებ კანონში პირდაპირ წერია, რომ ავტოსატრანსპორტო საშუალებას, რომელიც ეკუთვნის პოლიციას, უნდა ჰქონდეს განმსაზღვრელი სიმბოლიკა იმისთვის, რომ ადამიანებმა იდენტიფიცირება მოახდინონ", - აღნიშნა დეკანოიძემ.