16 დეკემბერს ველისციხეში მომხდარ ინციდენტში მონაწილე „ნაციონალური მოძრაობის“ წევრ ვალერი მუსაევს ბრალი ოფიციალურად წარედგინა. მუსაევი მეორე დღეა ყვარლის წინასწარი მოთავსების იზოლატორში იმყოფება, სადაც გამომძიებელმა ბრალი ცოტა ხნის წინ გააცნო. მას გამოძიება დავით კირკიტაძის მსგავსად ძალადობასა და პოლიციისთვის წინააღმდეგობის გაწევას ედავება.

დაკავებულის ადვოკატის ინფორმაციით, მისი დაცვის ქვეშ მყოფი ბრალს არ აღიარებს. "ჩემი დაცვის ქვეშ მყოფს გამოძიებამ იგივე ბრალდება წაუყენა, რაც დავით კირკიტაძეს. ვალერი მუსაევი ბრალდებაში თავს დამნაშავედ არ ცნობს და აცხადებს, რომ მას ავტობუსი არ დაუზიანებია. შეუძლებელი იყო ორ კაცს ერთდროულად მოეხდინა პოლიციელზე ძალადობა", - განაცხადა ადვოკატმა ბაადურ გულიაშვილმა.

აღკვეთის ღონისძიების შეფარდების საკითხზე გურჯაანის სასამართლო სავარუდოდ ხვალ იმსჯელებს. დღესვე ბრალი წარედგინათ შოთა დალაქიშვილის ცემისთვის დაკავებულ ლევან მაისურაძეს და მამუკა უსინაშვილს.