იუსტიციის უმაღლესმა საბჭომ საზოგადოებრივი აზრისთვის ანგარიშის გაწევა უნდა დაიწყოს, - ასე ეხმაურება პარლამენტის პირველი ვიცე-სპიკერი თამარ ჩუგოშვილი საბჭოს მიერ პარლამენტისთვის დასამტკიცებლად უზენაესი სასამართლოს მოსამართლეობის კანდიდატების წარდგენას.

როგორც „ინტერპრესნიუსს“ ჩუგოშვილმა განუცხადა, საჭიროა პარლამენტმა დაუყოვნებლივ დაიწყოს თავად უზენაესი სასამართლოს მოსამართლეების შერჩევის პროცედურებზე მუშაობა.

„უზენაესი სასამართლოს მოსამართლეების დანიშვნასთან დაკავშირებით ორი რამ მაქვს სათქმელი: ერთი არის პროცედურა, რა ფორმითაც იუსტიციის უმაღლესმა საბჭომ კანდიდატურები წარმოადგინა და რომელიც ჩემთვის მიუღებელია და მეორეა, კონკრეტული გვარები წარმოდგენილ სიაში. ზოგიერთ მათგანთან დაკავშირებით ჯერ კიდევ 2012 წელს გამოვთქვი ჩემი აზრი და ეს აზრი დღემდე არ შემიცვლია. ერთი მხრივ, პარლამენტმა დაუყოვნებლივ უნდა დაიწყოს უზენაესი სასამართლოს მოსამართლეების შერჩევის პროცედურებზე მუშაობა, მეორე მხრივ, იუსტიციის უმაღლესმა საბჭომ უნდა დაიწყოს საზოგადოებრივი აზრისთვის ანგარიშის გაწევა“, - განუცხადა „ინტერპრესნიუსს“ თამარ ჩუგოშვილმა.

შეგახსენებთ, რომ იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა. ესენი არიან: მარიამ ცისკაძე, ნინო ქადაგიძე, მიხეილ ჩინჩალაძე, პაატა სილაგაძე, დიმიტრი გვრიტიშვილი, მერაბ გაბინაშვილი, ნინო სანდოძე, თამარ ალანია, გიორგი ტყავაძე და გიორგი მიქაუტაძე. საბჭოს აღნიშნულმა გადაწყვეტილებამ საბჭოს არამოსამართლე წევრებში, არასამთავრობო ორგანიზაციებსა და ოპოზიციაში უკმაყოფილება გამოიწვია.