წარდგენილ ბრალს არ ვაღიარებთ, ეს იყო ქველმოქმედებისთვის განკუთვნილი თანხა, რომელიც ონკოლოგიურად დაავადებულ ადამიანს გადაერიცხა, - აღნიშნულის შესახებ ჟურნალისტებთან სამეგრელო-ზემო სვანეთის ყოფილი გუბერნატორის, ლევან შონიას ადვოკატმა, იზა კალატოზიშვილმა განაცხადა.

როგორც ის განმარტავს, შონიასთვის 10 000 დოლარის გადარიცხვა ბიზნესმენის კეთილი ნებით მოხდა და ამის დადასტურებას ისინი სასამართლოზე შეძლებენ.

ადვოკატის განმარტებითვე, თანხის დეკლარირების ვადა გასული არ არის.

"თანხის მიზნობრიობაც ნათლად ჩანს საქმის მასალებიდან, ანუ რისთვის იყო ეს თანხა დახარჯული, ყველაფერი ჩანს. ეს იყო ბიზნესმენის კეთილი ნება, მან თავისი ნებისა და სურვილისამებ გადაურიცხა ეს თანხა. დეკლარირების ვადა ჯერ არ ამოწურულა, აუცილებლად მოხდება ამის დეკლარირება დაწესებული დროის ვადით. თავიდანვე ვთანამშრომლობდით გამოძიებასთან, მომავალშიც ვითანამშრომლებთ და ნამდვილად დავადგენთ ჩვენს სიმართლეს", - განაცხადა კალატოზიშვილმა.

ყოფილ გუბერნატორს პროცესის დასრულების შემდეგ ჟურნალისტებთან კომენტარი არ გაუკეთებია.

შონიას აღკვეთის ღონისძიების სახით 5 000-ლარიანი გირაო შეეფარდა.