უბანზე, სადაც ამბობდნენ, რომ ბიულეტენები ჩაყარეს, სინამდვილეში უფრო ნაკლები ბიულეტენი იყო დათვლილი, - ამის შესახებ საქართველოს პრემიერ-მინისტრმა, მამუკა ბახტაძემ ბრიფინგზე განაცხადა.

„ბუნებრივია, როდესაც არსებობს გარკვეული ინფორმაცია არჩევნებში შესაძლო დარღვევაზე, ეს უნდა მოექცეს სამართლებრივ ჩარჩოებში და დაიწყოს გამოძიება. თუმცა რაც მე წავიკითხე, ერთ ცოტა კომიკურ ეპიზოდს ჰქონდა ადგილი. ერთ-ერთ უბანზე, სადაც ამბობდნენ, რომ ვითომ ბიულეტენები ჩაყარეს, სინამდვილეში უფრო ნაკლები ბიულეტენი იყო ზოგადად დათვლილი, აქედან გამომდინარე კიდევ ერთხელ საქმე გვქონდა დეზინფორმაციასთან. კიდევ ერთხელ ვიმეორებ, როდესაც არსებობს ეპიზოდი, სადაც ადგილი ჰქონდა გადაცდენას, მაშინ გამოძიება უნდა დაიწყოს დაუყოვნებლივ და პროკურატურა სწორედ ასეთ ჭრილში მოქმედებს“, - აღნიშნა პრემიერმა.