გავლენიანი „რესპუბლიკელი“ სენატორი ლინდსი გრემი აშშ-ს პრეზიდენტს დონალდ ტრამპს მოუწოდებს საგანგებო მდგომარეობა გამოაცხადოს მექსიკასთან საზღვარზე კედლის მშენებლობის დაფინანსების მისაღებად.

„წარმომადგენელთა პალატის სპიკერის ნენსი პელოზის უარმა, მოლაპარაკებები აწარმოოს სასაზღვრო კედლის დაფინანსების საკითხზე თუნდაც „შათდაუნის“ შეწყვეტის შემთხვევაში, ცხადყოფს, რომ კონგრესის ფარგლებში კედლის დაფინანსების საკითხზე გადაწყვეტილების მოძებნა ფაქტობრივად დასრულებულია. ბატონო პრეზიდენტო, „დემოკრატები“ კეთილსინდისიერად არ თანამშრომლობენ თქვენთან. გამოაცხადეთ საგანგებო მდგომარეობა და ააშენეთ კედელი“, - განაცხადა სენატორმა.

აშშ-ის პრეზიდენტი დონალდ ტრამპი მექსიკის საზღვარს ეწვია. იგი ტეხასის შტატში რიო გრანდეს სასაზღვრო გამშვებ პუნქტთან მივიდა. მას მესაზღვრეები ახლდნენ.

თეთრი სახლის ლიდერმა საზღვარზე ვიზიტისას კიდევ ერთხელ გაუსვა ხაზი კედლის მშენებლობის აუცილებლობას და განაცხადა,რომ თუ კონგრესი არ დაეთანხმება ამ ინიციატიას და არ დააფინანსებს კედლის მშენებლობას, საგანგებო მდგომარეობას გამოაცხადებს.

შეგახსენებთ, რომ მექსიკის საზღვარზე მიგრანტების შესაჩერებლად კედლის მშენებლობის გამო უთანხმოების შედეგად კონგრესმა ბიუჯეტი ვერ დაამტკიცა, რის გამოც უკვე 20 დღეა აშშ-ის მთავრობამ მუშაობა ნაწილობრივ შეაჩერა.