ადვოკატი ხორავას ქუჩაზე მომხდარი მკვლელობის საქმეზე დაკავებული არასრულწლოვნისთვის დღეს პატიმრობის შეცვლის შუამდგომლობას დააყენებს

ხორავას ქუჩაზე მომხდარი მკვლელობის საქმეზე ცრუ ჩვენების ბრალდებით დაკავებული არასრულწლოვნის, დ.ღ.-ს სასამართლო სხდომაზე დღეს, მისი ადვოკატები აღკვეთის ღონისძიების პატიმრობის შეცვლასთან დაკავშირებით შუამდგომლობას დააყენებენ. ამის შესახებ ჟურნალისტებს პროცესის დაწყებამდე მისმა უფლებადამცველმა გოჩა კვარაცხელიამ განუცხადა.

"დღეს დავაყენებთ შუამდგომლობას დ.ღ.-ს აღკვეთის ღონისძიების შეცვლასთან დაკავშირებით. სასამართლოში მოწმეთა მიერ მიცემული ჩვენებები და გამოკვლეული წერილობითი მტკიცებულებები ეწინააღმდეგება დ.ღ.-ს მიმართ წაყენებულ ბრალში მითითებულ ფაქტობრივ გარემოებებს, რაც ცალსახად ადასტურებს, რომ ის უდანაშაულოა", - განაცხადა კვარაცხელიამ.

დღევანდელ სასამართლო სხდომაზე კვლავ ბრალდების მხარის მტკიცებულებებს გამოიკვლევენ. კერძოდ კი, სასამართლოში ჩვენებას 5 მოწმე, მათ შორის რამდენიმე არასრულწლოვანი მისცემს.

შეგახსენებთ, რომ 2017 წლის პირველ დეკემბერს, ხორავას ქუჩაზე მომხდარი მკვლელობის ძირითადი საქმიდან გამოყოფილი საქმის ფარგლებში, ცენტრალური კრიმინალური პოლიციის დეპარტამენტის თანამშრომლებმა, ცრუ ჩვენების მიცემის ბრალდებით, არასრულწლოვანი დ.ღ. ივლისის თვეში დააკავეს. გამოძიებით დადგინდა, რომ დ.ღ.-მ, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება. კერძოდ, ხორავას ქუჩაზე მომხდარი მკვლელობის საქმეზე გამოძიებაში მოწმის სახით გამოკითხვისას დ.ღ -მ განაცხადა, რომ გარდაცვლილ დავით სარალიძეს ფიზიკურად დაუპირისპირდნენ კონფლიქტში მონაწილე გ.ჯ და მ.კ, რა დროსაც მ.კ. ფიზიკურ შეურაცხყოფას აყენებდა დავით სარალიძეს, თუმცა, სასამართლოში ჩვენების მიცემისას მ.კ-ს ფიზიკურ დაპირისპირებაში მონაწილეობა უარყო. გამოძიებით ასევე დადგინდა, რომ სასამართლო სხდომამდე დ.ღ. შეხვდა გარდაცვლილი დავით სარალიძის მშობელს და ესაუბრა ხორავას ქუჩაზე მომხდარი მკვლელობის ფაქტობრივ გარემოებებთან დაკავშირებით, თუმცა, სასამართლო განხილვის სტადიაზე მსგავსი შეხვედრა და საქმის ფაქტობრივ გარემოებებზე საუბარი უარყო.