პარლამენტის წევრი დავით ჭიჭინაძე ვიცე-სპიკერ გია ვოლსკის განცხადებას ეკა ბესელიასთან დაკავშირებით "კომკავშირულ გადმონაშთს" უწოდებს. ჭიჭინაძის შეფასებით, ვოლსკისგან ასეთი განცხადებები გასაკვირი არ არის.
„მათი პრობლემაა რამდენად მისაღები იქნება "ქართული ოცნებისთვის" დეპუტატებთან განშორება. ეს საკითხი არ ეხება მარტო ეკა ბესელიას, ბევრი დეპუტატი დგას ამ აზრზე მოსამართლეობის კანდიდატების სიასთან დაკავშირებით. ასეთი საუბარი, როგორიც ვოლსკის სჩვევია კოლეგებზე, კომკავშირული გადმონაშთია. პარტია, რომ გაკიცხავდა ვინმეს, შემდეგ ერთიანად კიცხავდნენ ყველა ქვემდებარე რგოლები. ვოლსკისგან ასეთი განცხადებები გასაკვირი არ არის",- განაცხადა ჭიჭინაძემ.
გია ვოლსკის თქმით, სამწუხაროა, რომ ბესელია თანამდებობიდან გადადგომის წინაპირობაზე საუბრისას, მოსამართლეების საკითხით აპელირებს. „ასეთი პოზიციებით ჩვენ გუნდში ერთად ვერ დავრჩებით - როგორი ფორმით მოხდება დაცილება ან საერთოდ მოხდება თუ არა, ამას მომავალი გვიჩვენებს“, - ამის შესახებ ჟურნალისტებს პარლამენტის ვიცე-სპიკერმა გია ვოლსკიმ ეკა ბესელიასთან დაკავშირებით დასმული კითხვის პასუხად განუცხადა.