თავისუფლებამ ეტყობა თავბრუ დაახვია მეთოფიშვილს და ორიენტირი აერია საით არიან დეპუტატები და საით მოსამართლეები, - ასე აფასებს პარლამენტის წევრი დავით ჭიჭინაძე მისი კოლეგების მიმართ იუსტიციის უმაღლესი საბჭოს მოსამართლე წევრის სერგო მეთოფიშვილის განცხადებებს. ჭიჭინაძე ურჩევს მეთოფიშვილს თავისუფლებაზე საუბარს თავი გაანებოს.

„თავისუფლებამ ეტყობა თავბრუ დაახვია მეთოფიშვილს და ორიენტირი აერია საით არიან დეპუტატები და საით მოსამართლეები. ამიტომ ჯობია ისევ იმ სიბინძურეში დაბრუნდეს და თავისუფლებაზე საუბარს თავი დაანებოს. დეპუტატები - გოგიჩაიშვილი იქნება, ჭიჭინაძე თუ სხვები, საზოგადოებას დაიცავენ ამისთანა უსამართლო მოსამართლეებისგან",- განაცხადა ჭიჭინაძემ.

„ბატონ გოგიჩაიშვილს, ქალბატონ ბესელიას და პატივცემულ კობერიძეს ვურჩევ, ნუ აწვდიან საზოგადოებას ცრუ ინფორმაციას, თითქოს მე, როგორც მოსამართლე, ღიად ვერევი პოლიტიკურ პროცესში და პოლიტიკურ განცხადებებს ვაკეთებ, ეს არის სიცრუე, - ამის შესახებ იუსტიციის უმაღლესი საბჭოს მოსამართლე წევრი სერგო მეთოფიშვილი „ფეისბუქის“ საკუთარ გვერდზე წერს.

მეთოფიშვილი გამოეხმაურა „ქართული ოცნების“ წევრის, ლევან გოგიჩაიშვილის განცხადებას, რომლის თანახმადაც, „იუსტიციის უმაღლესი საბჭოს წევრები მძიმე მდგომარეობაში არიან და საერთოდ გაცდნენ სამოსამართლეო საქმიანობას, გაიხადეს მანტიები და შემოვიდნენ პოლიტიკურ ველზე“. მეთოფიშვილის შეფასებით, გოგიჩაიშვილის ეს განცხადება სასამართლო სისტემისა და მოსამართლეებისთვის შეურაცხმყოფელია.