სალომე ზურაბიშვილი თვეში ერთხელ რეგიონებში სტუმრობას გეგმავს

ვაპირებ თვეში ერთხელ მაინც რომელიმე რეგიონს ვეწვიო, - ამის შესახებ სალომე ზურაბიშვილმა მედიასთან შეხვედრისას განაცხადა.როგორც ზურაბიშვილმა აღნიშნა, გაეცნობა რეგიონების პრობლემებს და მისი ფუნქციებიდან გამომდინარე ეცდება დაეხმაროს ადგილობრივ მოსახლეობას.

„ის დაპირება, რაც მე გავეცი, რომ ვიქნებოდი რეგიონების პრეზიდენტი, ნამდვილად ვაპირებ სიტყვის ერთგული ვიყო. ამის სიმბოლო თელავი იყო, თუ რა მნიშვნელობას ვანიჭებ რეგიონებს, როგორც ამ ქვეყნის სიძლიერის საწინდარს. ასევე, ვიყავი სამეგრელოში, იქ ერთ-ერთი პრიორიტეტია იმ საავადმყოფოს ამოქმედება, რომელიც შეიძლება გახდეს რეგიონისთვის ძალიან მიმზიდველი. ასევე იგეგმება ჩემს ადმინისტრაციაში შემდგომი ვიზიტები და ვაპირებ თვეში ერთხელ მაინც რომელიმე რეგიონს ვეწვიო და გავეცნოთ პრობლემებს ან ინიციატივებს, რომ ჩემი საპრეზიდენტო ფუნქციებიდან გამომდინარე დავეხმარო. თქვენც შეგატყობინებთ, როგორც კი დაიგეგმება, რომ პრესაც იყოს ამ რეგიონული ვიზიტების დროს ჩვენთან ერთად“, - განაცხადა ზურაბიშვილმა.