ხვალ პარლამენტის იურიდიულ საკითხთა კომიტეტის სხდომა გაიმართება, სადაც თავმჯდომარის მოადგილეს დავით მათიკაშვილს კომიტეტის თავმჯდომარის მოვალეობის შესრულება დაევალება.
პარლამენტის რეგლამენტის თანახმად, კომიტეტის თავმჯდომარის გადადგომის, გადაყენების ან უფლებამოსილების სხვაგვარად შეწყვეტის შემთხვევაში, კომიტეტის თავმჯდომარის მოვალეობას მისი პირველი მოადგილე ასრულებს. კომიტეტის თავმჯდომარის პირველი მოადგილის არყოფნის შემთხვევაში კი, კომიტეტის თავმჯდომარის მოვალეობის შესრულებას კომიტეტი სიითი შემადგენლობის უმრავლესობით მის ერთ-ერთ მოადგილეს ავალებს.
იურიდიულ საკითხთა კომიტეტის თავმჯდომარის თანამდებობიდან ეკა ბესელიას ოფიციალურად გადადგომამდე, კომიტეტმა მისი წარდგინებით, 31 დეკემბრის სხდომაზე, კომიტეტის თავმჯდომარის პირველ მოადგილედ გედევან ფოფხაძე აირჩია. ფოფხაძეს მხარი კომიტეტის შვიდმა წევრმა დაუჭირა, თუმცა ორ დღის შემდეგ, ფრაქცია “ქართულმა ოცნებამ“ ფოფხაძე კომიტეტის შემადგენლობიდან გაიწვია.
იურიდიულ საკითხთა კომიტეტის სხდომა 14 იანვარს, 12:00 სააათზეა დანიშნული.