ეკა ბესელია - ადვოკატებთან კარგი შეხვედრა იყო, ერთნაირი ხედვა გვაქვს იმ პროცესის მიმართ, რომელიც მოსამართლეთა დაკომპლექტებას ეხება

ერთნაირი ხედვა გვაქვს იმ პროცესის მიმართ, რომელიც ეხება უზენაესი სასამართლოს მოსამართლეთა დაკომპლექტებას, - ამის შესახებ იურიდიულ საკითხთა კომიტეტის ყოფილმა თავმჯდომარემ ეკა ბესელიამ იურიდიული ფირმების ასოციაციის წარმომადგენლებთან შეხვედრის დასრულების შემდეგ განაცხადა. ბესელიას თქმით, მოსამართლეთა შერჩევის პროცესთან დაკავშირებით მისი და ადვოკატების პოზიცია ერთმანეთს დაემთხვა.

„ძალიან კარგი შეხვედრა იყო, კმაყოფილი ვარ. ჩვენი პოზიცია ერთიანია. მათი ხედვა ემთხვევა სწორედ იმ სულისკვეთებას და იმ განწყობას, რაც ჩვენ ამ პროცესთან დაკავშირებით გვაქვს. ანუ ხედვაც ერთნაირი გვაქვს ამ პროცესის მიმართ, რომელიც ეხება უზენაესი სასამართლოს მოსამართლეთა დაკომპლექტებას. მზაობა გვაქვს, რომ ჩვენ ცვლილებების ერთიან ვერსიაზე ვიმუშავებთ და გვექნება ერთი პროექტი. შევთანხმდით იმაზე, რომ გაცილებით უფრო დიდი პლატფორმა შევქმნათ თანამშრომლობისთვის, სადაც იურისტების გარდა სხვა პროფესიული გაერთიანებებიც იქნებიან, რომელთაც ასევე აინტერესებთ როგორი იქნება მართლმსაჯულების სისტემა“, - განაცხადა ეკა ბესელიამ.