ვერაზე მანქანის ჩაცხრილვა და ორმხრივი სროლა შესაძლოა, მარგველაშვილის სიძის სამეგობროს კონფლიქტს უკავშირდებოდეს, - ამის შესახებ ინფორმაციას „რუსთავი2“ ავრცელებს. მაუწყებლის ინფორმაციით, მათი დაპირისპირება ექსპრეზიდენტ მარგველაშვილის სიძის, მინდია გოგოჭურის და კაჭარავას კონფლიქტს უკავშირდება და ეს კვლავ ორ სამეგობროს შორის სისხლიანი გარჩევის გაგრძელებაა. „კურიერის“ ცნობით, ადუაშვილი კაჭარავას მეგობარია, კუჭავა კი, სავარაუდოდ, გოგოჭურის.
არსებული ინფორმაციით, ავტომობილის ჩაცხრილვას წინ ჩხუბი უძღოდა, რა დროსაც ადუაშვილი დაიჭრა, შემდეგ კი მან იმ ავტომობილისკენ ისროლა, სადაც კუჭავა იჯდა. სროლის შემდეგ მძღოლმა, სავარაუდოდ, საჭე ვეღარ დაიმორჩილა, მანქანიდან გადმოვიდა, ავტომობილი კი ფილარმონიის დიდ საკონცერტო დარბაზთან დაპარკინგებულ სხვა მანქანას შეეჯახა.
შინაგან საქმეთა სამინისტროს ცნობით, გამოძიება სისხლის სამართლის კოდექსის ორი - 18-108 და 236-ე, მუხლით დაიწყო, რაც განზრახ მკვლელობის მცდელობას და იარაღის უკანონო შეძენა-შენახვა-ტარებას გულისხმობს.