დარწმუნებული ვარ, რომ პროცესი გამჭვირვალედ და სამართლიანად წარიმართება, - ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა უზენაესი სასამართლოს მოსამართლეების სიასა და უმრავლესობის ნაწილთან ეკა ბესელიას დაპირისპირების თემაზე საუბრისას განაცხადა. მინისტრის მიერ გაკეთებულ კომენტარს, რეგიონული განვითარებისა და ინფრასტრუქტურის სამინისტროს პრესსამსახური ავრცელებს.

,,სიასთან დაკავშირებით პოზიციას, რომელიც უკვე გაჟღერდა, ვიზიარებ, ამ გადაწყვეტილებით, ორგანული კანონის დონეზე დარეგულირდება და განისაზღვრება ის კრიტერიუმები, რომლის საფუძველზეც უნდა მოხდეს მოსამართლეთა შერჩევა, დარწმუნებული ვარ, რომ ეს კრიტერიუმებიც იქნება დადგენილი. მოგეხსენებათ, რადგანაც ორგანული კანონია მაღალი დონის კონსენსუსია საჭირო პარლამენტში და შესაბამისად, მჯერა, რომ ეს პროცესი გამჭვირვალედ და სამართლიანად წარიმართება. ასე რომ, ყველა ის ადამიანი, რომელსაც სასამართლოს ბედი აინტერესებს საქართველოში დარწმუნდება, რომ ეს პროცესი სწორად წარიმართა“, - განაცხადა ცქიტიშვილმა.