დიდი ბრიტანეთის პრემიერ-მინისტრი ტერეზა მეი თანამდებობიდან გადადგომას არ აპირებს და ძალისხმევის კონცენტრირებას მოახდენს ქვეყნის ევროკავშირიდან გასვლის რეალიზებაზე, - ამის შესახებ დიდი ბრიტანეთის პრემიერის წარმომადგენელმა მას შემდეგ განაცხადა, რაც ქვეყნის პარლამენტის თემთა პალატამ მხარი არ დაუჭირა ტერეზა მეის მთავრობის მიერ ევროკავშირთან მიღწეულ შეთანხმებას „ბრექსიტის“ შესახებ.
როგორც ტერეზა მეის წარმომადგენელმა განაცხადა, პრემიერი მიიჩნევს, რომ მას პარლამენტის ქვედა პალატის მხარდაჭერა აქვს.
მან ასევე ხაზგასმით აღნიშნა, რომ თუ მთავრობას უნდობლობას გამოუცხადებენ, მმართველ პარტიას ორი კვირის განმავლობაში შეუძლია ალტერნატიული მთავრობის ფორმირება და ხელახლა ნდობის ვოტუმის პროცედურის გავლა.
შეგახსენებთ, რომ გუშინ დიდი ბრიტანეთის პარლამენტის თემთა პალატამ ხმათა უმრავლესობით ჩააგდო ევროკავშირისა და დიდი ბრიტანეთის მთავრობის მიერ შეთანხმებული პროექტი, რომელიც ევროკავშირის შემადგენლობიდან დიდი ბრიტანეთის გასვლას ეხებოდა.