საფრანგეთის პრეზიდენტმა ემანუელ მაკრონმა ევროკავშირის დიდ ბრიტანეთთან „ბრექსითის“ თაობაზე ახალი მოლაპარაკების შესაძლებლობა გამორიცხა. ამის შესახებ ფრანგული გამოცემა Le Figaro იუწყება.
„შეიძლება შეთანხმების ერთი ან ორი პუნქტის გაუმჯობესება, თუმცა არც ამის მჯერა, ვინაიდან ჩვენ მაქსიმალურად შესაძლებელი გავაკეთეთ ამ შეთანხმების მისაღწევად და უარს არ ვიტყვით ევროპელების ინტერესების დაცვაზე ბრიტანეთის შიდა პრობლემების გადასაჭრელად“, - განაცხადა საფრანგეთის პრეზიდენტმა.
მან ასევე აღნიშნა, რომ შეთანხმების გარეშე ევროკავშირიდან გასვლით, პირველ რიგში ბრიტანელები იზარალებენ.
შეგახსენებთ, რომ გუშინ დიდი ბრიტანეთის პარლამენტის თემთა პალატამ ხმათა უმრავლესობით ჩააგდო ევროკავშირისა და დიდი ბრიტანეთის მთავრობის მიერ შეთანხმებული პროექტი, რომელიც ევროკავშირის შემადგენლობიდან დიდი ბრიტანეთის გასვლას ეხებოდა.