ირმა ჭკადუა - პროკურორი არ უნდა იყოს საპროკურორო საბჭოს თავმჯდომარე

ეჭვი მაქვს, საპროკურორო საბჭოს თავმჯდომარეობაზე მხარს არ დამიჭერენ, - ამის შესახებ ჟურნალისტებს ადვოკატმა ირმა ჭკადუამ განუცხადა, რომელმაც შესაძლოა, საპროკურორო საბჭოს თავმჯდომარეობაზე კენჭი იყაროს.

როგორც ირმა ჭკადუამ ჟურნალისტებთან საუბრისას განაცხადა, დააყენებს თუ არა ის კანდიდატურას, დამოკიდებულია იმაზე, თუ ვინ იქნებიან სხვა კანდიდატები. მისივე განცხადებით, მნიშვნელოვანია მიიღოს ინფორმაცია სხვა კანდიდატებზე, რაც მას კანდიდატურის დაყენების გადაწყვეტილების მიღებაში დაეხმარება.

„არ ვიცი ვინ იქნებიან კანდიდატები. ჩემთვის ეს არის მნიშვნელოვანი და აქედან გამომდინარე მივიღებ გადაწყვეტილებას. დავაყენებ თუ არა ჩემს კანდიდატურას, დამოკიდებულია იმაზე, თუ ვინ გამოთქვამს კიდევ სურვილს. მე ვფიქრობ, რომ კორპორატიული ინტერესებიდან გამომდინარე, პროკურორი არ უნდა იყოს საპროკურორო საბჭოს თავმჯდომარე. ეჭვი მაქვს, რომ მხარი დაუჭირონ ჩემს კანდიდატურას“, - აღნიშნა ირმა ჭკადუამ.

საპროკურორო საბჭოს თავმჯდომარის კანდიდატურების განხილვა და დამტკიცების პროცედურა საქართველოს მთავარ პროკურატურაში დაიწყო. კანდიდატებს განიხილავს 15-წევრიანი საპროკურორ საბჭო, რომელშიც შედიან პროკურორები, ასევე საპარლამენტო უმცირესობისა და უმრავლესობის წარმომადგენლები. ამ ეტაპზე ცნობილია, რომ საპარლამენტო უმცირესობა არ აპირებს მხარი დაუჭიროს არც ერთ კანდიდატს. რაც შეეხება უმრავლესობას, მას წარმოადგენს იურიდიულ საკითხთა კომიტეტის ყოფილი თავმჯდომარე ეკა ბესელია, რომლის პოზიციაც უცნობია, ვინაიდან აღნიშნულ საკითხთან დაკავშირებით პოზიცია ჯერჯერობით ეკა ბესელიას არ დაუფიქსირებია.

დავით ნარმანია - თუ არ გვინდა გაგვიძვირდეს ტარიფები, უნდა ავაშენოთ ჰესები
ქართული პრესის მიმოხილვა 23.10.2019
დიმიტრი შველიძე  -  მომავალი პარლამენტი ნაყიდი დეპუტატებით და ფრაქციებით აივსება
„პროკრედიტ ბანკი“ მომხმარებლებს ელექტრო მანქანის შესაძენად დაფინანსების ახალ შესაძლებლობას სთავაზობს
საქართველოში პირველად, უძრავი ქონების სკოლა Reschool გაიხსნება
კრისტალის საჭადრაკო ბლიც-თამაში "ყველა ქალი ჩემპიონია"
სასტუმრო „რადისონ ბლუ ივერიამ“ 10 წლის იუბილე აღნიშნა