„იცოდე მეტი გრიპის შესახებ", - ამ სახელწოდებით თბილისის სახელმწიფო სამედიცინო უნივერსიტეტის ადმინისტრაციის წარმომადგენლებმა, სტუდენტებთან ერთად, მეტროსადგურ „რუსთაველთან" საინფორმაციო აქცია გამართეს.

ამ მიზნით, მათ საინფორმაციო სტენდი ჰქონდათ მოწყობილი და გამვლელებს გრიპის ვირუსთან დაკავშირებით, ფლაერები და პირბადეები დაურიგეს. ასევე, წარმოდგენილი ჰქონდათ სადეზინფექციო ხელის დასაბანი ხსნარებიც.

ფლაერებზე დატანილი ინფორმაციით, სტუდენტები გრიპის შესახებ მოსახლეობის ინფორმირებას ახდენდნენ. აქციის მონაწილეების თქმით, პირბადეების გაკეთება მხოლოდ დახურულ სივრცეშია მიზანშეწონილი.

თსსუ-ს ადმინისტრაციის წარმომადგენლის მიხეილ დიაკონიძის განცხადებით, პრევენციული ღონისძიებები ძალიან დაეხმარება საზოგადოებას და გრიპთან დაკავშირებულ ვნებათაღელვასა და მიმართვიანობას შეამცირებს.

„გარდა სამედიცინო კადრების მომზადებისა, თბილისის სახელმწიფო სამედიცინო უნივერსიტეტის ერთ-ერთ ძირითად ფუნქციას წარმოადგენს სწორედ საზოგადოების განათლებაზე ზრუნვა. ამ მისიის ფარგლებში სამედიცინო უნივერსიტეტი დღეს ატარებს აქციას სახელწოდებით "იცოდე მეტი გრიპის შესახებ". აღნიშნული აქცია ემსახურება ბოლო პერიოდში სეზონური გრიპისთვის დამახასიათებელ ვნებათაღელვას. ვცდილობთ, მოსახლეობას მივაწოდოთ ინფორმაცია, როგორ უნდა დავიცვათ თავი გრიპისგან, როგორ ავიცილოთ აღნიშნული რისკები. ასევე, ხაზს ვუსვამთ, რომ საჭიროა დროული ვიზიტი სამედიცინო დაწესებულებებში, რადგან დაგვიანებული მიმართვიანობა ერთ-ერთ გართულებას წარმოადგენს", - განაცხადა დიაკონიძემ.

მედიცინის ფაკულტეტის მეორე კურსის სტუდენტის დათო მაწკეპლაძის თქმით, მოსახლეობაში არსებული პანიკა დიდწილად ინფორმაციის ნაკლებობითაა გამოწვეული. მან მოუწოდა მოსახლეობას, გრიპის სიმპტომების გამოვლენისთანავე დროულად მიმართონ ექიმს.