ვერაზე მომხდარი სროლის საქმეზე განსაკუთრებით მძიმე კატეგორიის დანაშაულის შეუტყობინებლობის ბრალდებით დაკავებული კონსტანტინე ჯორბენაძის ადვოკატმა ტარიელ კაკაბაძემ სასამართლოს აღკვეთის ღონისძიების სახით გირაოს შეფარდების შუამდგომლობით მიმართა.

კაკაბაძე თავის შუამდგომლობაში აღკვეთის ღონისძიების სახით ჯორბენაძის მიმართ 7 000- ლარიანი გირაოს გამოყენებას ითხოვს.

როგორც ადვოკატმა თავის შუამდგომლობაში განმარტა, ჯორბენაძე უკანონოდ არის დაპატიმრებული და მას არც მიმალვა უცდია. კაკაბაძის განცხადებით, ის პირველივე წუთებიდან ემორჩილებოდა სამართალდამცავების მითითებას. ადვოკატის თქმით, სწორედ ჯორბენაძემ შეიყვანა დაჭრილი გიორგი ადუაშვილი საავადმყოფოში. მისივე განმარტებით, ბრალდებული ინფორმირებული იყო, რომ მას პოლიციის განყოფილებაში გადაყვანას უპირებდნენ, თუმცა, არც ერთ მოწმეზე ზემოქმედება არ უცდია.

კონსტანტინე ჯორბენაძეს ბრალის დამტკიცების შემთხვევაში 3-დან 7 წლამდე თავისუფლების აღკვეთა ემუქრება.