საქართველოს საგარეო საქმეთა მინისტრი დავით ზალკალიანი რუსეთის ხელისუფლებას და საოკუპაციო რეჟიმების წარმომადგენლებს საოკუპაციო ხაზის გახსნისკენ მოუწოდებს. შესაბამისი განცხადება მინისტრმა მთავრობის სხდომის დასრულების შემდეგ გააკეთა.

„რამდენიმე დღეა, ოკუპირებული ტერიტორიების ე.წ. საზღვარი საოკუპაციო რეჟიმების მხრიდან არის დაკეტილი. ეს არის აბსოლუტურად და კატეგორიულად მიუღებელი ჩვენთვის. ამ საკითხზე ინტენსიურად ვმუშაობთ საერთაშორისო პარტნიორებთან. საკითხი არის დაყენებული ჟენევის თანათავმჯდომარეების დღის წესრიგში და მუდმივი კომუნიკაცია არსებობს მათთან. მოვუწოდებთ რუსეთის ფედერაციას და საოკუპაციო რეჟიმს, დაუყოვნებლივ გახსნან ე.წ. გამშვები პუნქტები საოკუპაციო ხაზის გასწვრივ. ეს პირველ რიგში არის მნიშვნელოვანი ჰუმანიტარული საკითხი, რომელიც სერიოზულ საფრთხეს უქმნის ისეთ ფუნდამენტურ უფლებას, როგორიც არის თავისუფალი გადაადგილება. მოვუწოდებთ, საოკუპაციო რეჟიმებს, რომ დაუყოვნებლივ მიიღონ ზომები საოკუპაციო ხაზის დაუყოვნებლივ გახსნასთან დაკავშირებით“, - განაცხადა მინისტრმა.