აშშ-ს სპეცპროკურორის რობერტ მუელერის ოფისმა არასწორი უწოდა ინტერნეტ-გამოცემა BuzzFeed-ის მიერ გავრცელებულ ინფორმაციას, რომლის თანახმადაც, დონალდ ტრამპმა თავის ადვოკატს თითქოს მითითება მისცა, რომ კონგრესისთვის ცრუ ინფორმაცია მიეცა მოსკოვში ცათამბჯენის მშენებლობის შესახებ მოლაპარაკებების დასრულების ვადებზე.

„სპეცპროკურორის ოფისის მიერ მოპოვებული დოკუმენტებისა და ჩვენებების აღწერა, რომელიც მაიკლ კოენს ეხება, სწორი არ არის“, - ნათქვამია რობერტ მუელერის ოფისის განცხადებაში.

შეგახსენებთ, რომ ხუთშაბათს ინტერნეტ-გამოცემა BuzzFeed-მა წყაროზე დაყრდნობით ინფორმაცია გაავრცელა, რომლის თანახმად, აშშ-ს პრეზიდენტის ყოფილმა ადვოკატმა მაიკლ კოენმა რობერტ მუელერს ჩვენება მისცა, რომ დონალდ ტრამპმა მას დაავალა კონგრესისთვის ცრუ ჩვენება მიეცა მოსკოვში ცათამბჯენის მშენებლობასთან დაკავშირებულ საკითხზე.

მოგვიანებით დონალდ ტრამპის ადვოკატმა რუდოლფ ჯულიანიმ განაცხადა, რომ პრეზიდენტს არასოდეს მიუცია მაიკლ კოენისთვის ამგვარი მითითებები.

იხილეთ ვიდეო: აშშ-ს სპეცპროკურორმა უარყო გამოცემა BuzzFeed-ის ინფორმაცია, ტრამპის ყოფილი ადვოკატის მიერ კონგრესისთვის ცრუ ჩვენების მიცემის თაობაზე