ისრაელის დაზვერვის მინისტრმა ისრაელ კაცმა განაცხადა, რომ ისრაელი ირანთან მიმართებაში წითელი ხაზების პოლიტიკას მომავალშიც აწარმოებს.
აღნიშნულით მინისტრმა კომენტარი გააკეთა გუშინ ისრაელის საჰაერო ძალების მიერ სირიაში ირანის სამხედრო ობიექტების წინააღმდეგ განხორციელებულ ავიადარტყმებზე.
„ისრაელი განაგრძობს წითელი ხაზების პოლიტიკის წარმოებას სირიაში ირანის სამხედრო ინფრასტრუქტურის განლაგებასთან დაკავშირებით. ისრაელის საჰაერო ძალების მიერ სირიაში ირანის სამხედრო ობიექტების წინააღმდეგ განხორციელებული იერიში მკაფიო მესიჯია ირანისთვის: „ვინც შენ მოსაკლავად მოვიდა, დაასწარი მას და პირველმა მოკალი“. ვინც ისრაელის მიმართულებით რაკეტებს უშვებს, საფასურის გადახდა მოუწევს ამისთვის“, - განაცხადა ისრაელის დაზვერვის მინისტრმა.
შეგახსენებთ, რომ ისრაელის საჰაერო ძალებმა სირიაში მდებარე ირანის სამხედრო ობიექტებზე საჰაერო დარტყმები განახორციელა. როგორც ისრაელის თავდაცვითი ძალების პრესსამსახური იუწყება, ავიაიერიშის შედეგად განადგურებულია საწყობები, დაზვერვის ობიექტები და ჰაერსაწინააღმდეგო თავდაცვის ბატარეები.
„სირიის ტერიტორიიდან მოქმედმა „ალ-კუდსის“ ძალებმა „მიწა-მიწის“ ტიპის რაკეტები გაუშვეს გოლანის სიმაღლეების მიმართულებით, რომელიც განეიტრალებულია საჰაერო თავდაცვის სისტემა „რკინის გუმბათის“ მიერ. აღნიშნულის საპასუხოდ ღამის განმავლობაში ისრაელის საჰაერო ძალებმა იერიში მიიტანეს სირიაში „ალ-კუდსის“ ობიექტებზე, ასევე სირიის ჰაერსაწინააღმდეგო თავდაცვის ბატარეებზე“, - ნათქვამია ისრაელის თავდაცვითი ძალების განცხადებაში.