რომც გვინდოდეს, იმდენ მოსამართლეს ვერ ვიპოვით, რომ სამოსამართლეო სისტემა მთლიანად ჩავანაცვლოთ, - ამის შესაძლებლობა ფიზიკურად არ არსებობს, - აღნიშნული განცხადება ჟურნალისტებთან საუბრისას ფრაქცია “ქართული ოცნების“ დეპუტატმა სოფო კილაძემ გააკეთა.

მისივე თქმით, პარლამენტი ვალდებულია უზენაესი სასამართლოს მოსამართლეობის კანდიდატთა სიასთან დაკავშირებით, რომელმაც ვნებათაღელვა გამოიწვია, გონივრული გადაწყვეტილება მიიღოს.

“მიკვირს დამოკიდებულება, რაც პროცესის მიმართ გამოვლინდა. თუ ვინმეს აქვს პრეტენზია ხარვეზებთან დაკავშირებით, არსებობს სამართლებრივი ბერკეტები და ყველა ის სამართლებრივი ბერკეტი უნდა გამოვიყენოთ, რაც არის ჩვენს ხელთ. მოთხოვნები იმის შესახებ, რომ მთელი სამოსამართლო კორპუსი სასამართლო სისტემიდან გავიყვანოთ და ახალი სისტემა ჩამოვაყალიბოთ, სადაც სრულიად ახალი მოსამართლეები იქნებიან, აბსურდულიც კი არის, რადგან წარმოუდგენელია საქართველოში იმ კვალიფიკაციის მოსამართლეები ვიპოვოთ, რომელიც ყველა ადგილს შეავსებს. რომც გვინდოდეს იმდენ მოსამართლეს ვერ ვიპოვით, რომ სამოსამართლეო სისტემა მთლიანად ჩავანაცვლოთ - ამის შესაძლებლობა ფიზიკურად არ არის. მგონია, რომ სამართლებრივ გზას უნდა მივყვეთ, რომელიც დიდი ხანია დავისახეთ“, - განუცხადა ჟურნალისტებს სოფო კილაძემ.