როდესაც ორი მნიშვნელოვანი ძალაუფლების მქონე ოპერატორის მიერ ერთად ხდება ასეთი განცხადების გაკეთება, ბუნებრივია, კითხვა ჩნდება, ხომ არ არის ეს შეთანხმებული, - ამის შესახებ ჟურნალისტებს, კომუნიკაციების ეროვნული კომისიის თავმჯდომარემ, კახა ბექაურმა განუცხადა. მისი თქმით, ბაზარზე არსებული წინასწარი მდგომარეობით არანაირი საფუძველი არ არსებობს, რომ ფასები გაიზარდოს. ამასთან, კომისიის თავმჯდომარე აღნიშნავს, რომ კომისიას ყველანაირი ბერკეტი აქვს, თუ კომპანიების მხრიდან არაკანონზომიერ ქმედებას ექნება ადგილი, ეს ქმედება აღკვეთონ.

„როდესაც ორი მნიშვნელოვანი ძალაუფლების მქონე ოპერატორის მიერ ერთად ხდება ასეთი განცხადების გაკეთება ბუნებრივია, კითხვა ჩნდება, ხომ არ არის ეს შეთანხმებული. ჩვენც გვაქვს ეს კითხვა და ეს ძალიან ლეგიტიმური კითხვაა. ამას ვებრძოდით ჩვენ ამდენი ხანი. ბოლო რამდენიმე წლის განმავლობაში შევცვალეთ დუოპოლია და განვახორციელეთ მნიშვნელოვანი პროცესები, რომ მეტი კონკურენცია ყოფილიყო, რომ არ ყოფილიყო ფასების შეთანხმება და კარტელური შეთანხმებები. დიდი მუშაობის შედეგად გვგონია, რომ ეს უკან ჩამოვიტოვეთ, შესაბამისად, თუ მსგავსი ნიშნები გამოვლინდება, უმკაცრესი რეაგირება გვექნება“, - აღნიშნა კახა ბექაურმა.