თბილისის მიწათსარგებლობის გენერალური გეგმა უახლოეს მომავალში დამტკიცდება, - ამის შესახებ თბილისის მერმა კახა კალაძემ ჟურნალისტებს განუცხადა. როგორც კალაძემ აღნიშნა, მუნიციპალიტეტის საკრებულოში დოკუმენტის საბოლოო ვერსიის განხილვა ჯერ კიდევ მიმდინარეობს.

„გენერალური გეგმა უახლოეს მომავალში იქნება დამტკიცებული. მიმდინარეობს რეგულაციებზე მუშაობა, ეს არის ძალიან მნიშვნელოვანი, არის ის რეგულაციები, რითაც უნდა მოხდეს გენგეგმის აღსრულება, რომელიც არის წარდგენილი თბილისის საკრებულოში“, - განაცხადა კალაძემ.

შეგახსენებთ, რომ თბილისის გენგეგმაზე მუშაობა მერიის წინა მმართველობის დროს, 2015 წელს დაიწყო და 2017 წელს უნდა დასრულებულიყო. დოკუმენტის შესაქმნელად მერიამ 2 800 000 ლარი გამოიყო. საკრებულოში გენგეგმის განხილვა რამდენიმე თვეა მიმდინარეობს. მიუხედავად იმისა, რომ დოკუმენტი ძალაში 1-ელ იანვარს უნდა შესულიყო, ჯერ დამტკიცებული არ არის.