ვაშინგტონი განაგრძობს მიზეზების ძებნას, რათა ვლადიმერ პუტინსა და დონალდ ტრამპს შორის ახალი შეხვედრა არ შედგეს, - ამის შესახებ რუსეთის საგარეო საქმეთა მინისტრის მოადგილემ სერგეი რიაბკოვმა განაცხადა.

„პარიზში და ბუენოს-აირესში პრეზიდენტები შეხვდნენ ერთმანეთს, თუმცა ეს არ იყო დელეგაციების ფორმატში შეხვედრა ფიქსირებული დღისწესრიგით. მიზეზი იმისა, რომ ჰელსინკიში შეხვედრის შემდეგ ახალი სრული ფორმატის შეხვედრა არ შემდგარა ის არის, რომ ვაშინგტონის შიდაპოლიტიკურ ქაოსში არიან ძალები, რომლებიც რუსულ მხარესთან კონტაქტს საძრახისად წარმოაჩენენ“, - განაცხადა რუსეთის საგარეო საქმეთა მინისტრის მოადგილემ.

სერგეი რიაბკოვის თქმით, ამერიკული მხარე ყოველთვის პოულობს საბაბს, რომ შეხვედრა არ შედგეს.

„გახსოვთ ალბათ, თუ როგორ გაათამაშეს ქერჩის სრუტეში მომხდარი ინციდენტი და რა განცხადებები გააკეთეს ამასთან დაკავშირებით, თუ როგორი წინაპირობები წამოაყენეს, რომ შეხვედრა გამართულიყო. ამიტომაც ყველა კითხვები ვაშინგტონს უნდა დავუსვათ“, - განაცხადა მან.