კახა კალაძე მერიაში უშტატო თანამშრომლების დანიშვნაზე - ალბათ, საჭიროება იყო და მოხდა ამის გაკეთება

ალბათ, საჭიროება იყო და მოხდა ამის გაკეთება, - ასე უპასუხა დედაქალაქის მერმა კახა კალაძემ ჟურნალისტის დასმულ კითხვას, რატომ დაინიშნა მერის მიერ 26 დეკემბერს გამოცემული ბრძანებით 119 უშტატო თანამშრომელი დედაქალაქის მერიაში და რატომ ერიცხებათ მათ ხშირ შემთხვევაში მინისტრზე მაღალი ხელფასი.

როგორც კალაძემ აღნიშნა, ის დეტალებზე ვერ ისაუბრებს და ჟურნალისტებს მოუწოდა ფაქტით დაინტერესების შემთხვევაში დეტალური ინფორმაცია თბილისის მერიისგან მიიღონ.

„ვერ გეტყვით კონკრეტულად რაზე გაქვთ საუბარი, თუ დეტალურად გაინტერესებთ, მობრძანდით და დეტალურად მოგაწვდით ინფორმაციას. ალბათ, საჭიროება იყო და მოხდა ამის გაკეთება. თუ გაქვთ ინტერესი და სურვილი რაშია საქმე, მობრძანდით დედაქალაქის მერიაში, ჟურნალისტებისთვის კარი ყოველთვის ღიაა და მიიღებთ სწორ, დეტალურ და ამომწურავ ინფორმაციას. გამიჭირდება ახლა ციფრებზე საუბარი ამიტომ მობრძანდით მერიაში“, - განაცხადა კალაძემ.