სამგორის რაიონში არსებული სამხედრო დასახლება თავდაცვის სამინისტროს ბალანსიდან დედაქალაქის მუნიციპალიტეტის ბალანსზე გადავა. ამის შესახებ თბილისის მთავრობის სხდომაზე დედაქალაქის მერმა კახა კალაძემ განაცხადა. მისი თქმით, როგორც კი შესაბამისი პროცედურები დასრულდება, დაიწყება აღნიშნული ტერიტორიის მოწესრიგება.

„სამგორის რაიონში არსებობს სამხედრო დასახლება, იქ მცხოვრებლებმა არაერთხელ მოგვმართეს, რომ შიდა ტერიტორია არის ძალიან მძიმე მდგომარეობაში და მოუწესრიგებელი. არსებულ დასახლებაში მდებარე შენობა-ნაგებობები არის თავდაცვის სამინისტროს ბალანსზე. უკვე მქონდა კომუნიკაცია თავდაცვის მინისტრთან და მივიღეთ გადაწყვეტილება, რომ ეს ტერიტორია გადმოვა მუნიციპალიტეტის ბალანსზე. რამდენიმე დღეში, როგორც კი დასრულდება ეს პროცედურები, დავიწყებთ ამ ტერიტორიის მოწესრიგებას. პროექტი უკვე მზად არის“, - განაცხადა კალაძემ.