ოკუპირებული აფხაზეთის გალის რაიონის მოსახლეობამ ადმინისტრაციის შენობის წინ, დღეს საპროტესტო აქცია გამართა. მოსახლეობა ენგურის გამშვები პუნქტის დახურვას აპროტესტებდა.

შეგახსენებთ, რომ H1N1 ვირუსის გამო ოკუპირებული აფხაზეთის დე ფაქტო უშიშროების სამსახურმა ე.წ. საზღვარი საქართველოსთან ორი თვით ჩაკეტა.

გალის რაიონის ადმინისტრაციის შენობასთან 80-მდე ადამიანი შეიკრიბა. ადმინისტრაციის დე ფაქტო ხელმძღვანელმა თემურ ნადარაიამ მომიტინგეებს განუცხადა, რომ „საზღვრის ჩაკეტვის მიზანია აფხაზეთში ღორის გრიპის გავრცელების თავიდან აცილება“.

ამჟამად ე.წ. საზღვრის გადაკვეთა დაშვებულია ენერგეტიკის სფეროში დასაქმებული პირებისათვის და მძიმედ დაავადებული პირებისათვის, ვინც საქართველოს ხელისუფლების მიერ კონტროლირებად ტერიტორიაზე მკურნალობს.