ამოღებულ საბრძოლო მასალაზე არც ერთი დაკავებულის თითის ანაბეჭდი არ აღმოჩნდა, - ამის შესახებ ჟურნალისტებს საქართველოში დაკავებული უკრაინის 6 და საქართველოს ერთი მოქალაქის ადვოკატმა, გიორგი როსტომაშვილმა განუცხადა.

დაკავებულებს ბრალდების მხარე ცეცხლსასროლი იარაღის, საბრძოლო მასალისა და ასაფეთქებელი მოწყობილების ჯგუფურად მართლსაწინააღმდეგო შეძენა-შენახვას ედავება.

დღევანდელ წინასასამართლო სხდომაზე ბრალდებისა და დაცვის მხარე საკუთარ მტკიცებულებებს წარადგენს, სასამართლო კი მათი დასაშვებობის საკითხზე იმსჯელებს.

„დღესდღეობით მტკიცებულებაზე არც ერთის თითის ანაბეჭდი არ აღმოჩნდა. ანაბეჭდი არ იყო არც ერთ ამოღებულ საბრძოლო მასალაზე. დღეს არის წინასასამართლო პროცესი, დავაფიქსირებთ ჩვენს პოზიციას, ასევე აღკვეთი ღონისძიების განხილვა იქნება. ამ ეტაპზე ბრალდებულები დანაშაულს არ აღიარებენ", - განაცხადა როსტომაშვილმა.

თბილისის საქალაქო სასამართლოში საქართველოში დაკავებული უკრაინის 6 და საქართველოს ერთი მოქალაქის სასამართლო პროცესი მიმდინარეობს. შვიდივე მათგანს აღკვეთის ღონისძიების სახით პატიმრობა აქვს შეფარდებული.

შეგახსენებთ, შინაგან საქმეთა სამინისტრომ თბილისში, ლიხაურის ქუჩაზე მდებარე სასტუმრო „გურუსა“ და „ალიანსში“ სპეცოპერაცია ჩაატარა. შსს-ს მიერ გავრცელებული ინფორმაციით, დაკავებულები არიან უკრაინის მოქალაქეები: ო.ნ., რ.მ., დ.კ. ი.კ., ი.ო., ს.კ. და საქართველოს მოქალაქე ლ.ჩ. მათივე ინფორმაციით, სასტუმროს ნომრების ჩხრეკისას ამოღებულია „ბერეტას“ და „მაკაროვის“ სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.