მე ვფიქრობ, ნაჩქარევი გადაწყვეტილებების მიღება არ იქნება კარგი, - ამის შესახებ საპარლამენტო უმრავლესობის ლიდერმა არჩილ თალაკვაძემ განაცხადა რითაც გამოეხმაურა „კოალიცია დამოუკიდებელი და გამჭვირვალე მართლმსაჯულებისთვის“ განაწყვეტილებას მოსამართლეთა შესარჩევ სამუშაო ჯგუფში მონაწილეობაზე უარის თაობაზე. მისი თქმით, ყველას ექნება შესაძლებლობა მოსამართლეობის კანდიდატების შერჩევის კრიტერიუმებზე საკუთარი პოზიცია დააფიქსიროს.

„ჩვენ ვთქვით, რომ ყველა ძირითად დაინტერესებულ მხარეს ექნებოდა შეთავაზება და შესაძლებლობა, რომ ამ სამუშაო პროცესში ჩაერთოს. ეს შესაძლებლობა დღეს უზრუნველყოფილია და ეს შეთავაზება მათ აქვთ. მე ვფიქრობ, ნაჩქარევი გადაწყვეტილებების მიღება არ იქნება კარგი, ვინაიდან როგორც სამოქალაქო საზოგადოების ასევე პარლამენტის და სხვა მხარეების საერთო სურვილი იყო, რომ პროცედურებთან კრიტერიუმებთან, რეგულაციებთან დაკავშირებით სამუშაო პროცესი შემდგარიყო და მხოლოდ ამის შემდეგ ემსჯელა პარლამენტს მოსამართლეობს კანდიდატებთან დაკავშირებით. მე ვფიქრობ, რომ დღეს ეს საერთო შეთანხმება ძალაშია სამუშაო პროცესი იწყება, ყველას ექნება შესაძლებლობა საკუთარი ხედვა კრიტერიუმებთან, ან ერთ რომელიმე კრიტერიუმთან დაკავშირებით გამოხატოს, დაასაბუთოს. ვფიქრობ, რომ ყველა კრიტერიუმი, რომელსაც ჯანსაღი არგუმენტაცია ექნება, შესაძლოა გათვალისწინებული იყოს“, - განაცხადა თალაკვაძემ.

შეგახსენებთ, რომ „კოალიცია დამოუკიდებელი და გამჭვირვალე მართლმსაჯულებისთვის“ მოსამართლეთა შესარჩევ სამუშაო ჯგუფში მონაწილეობაზე უარს აცხადებს. მათივე განმარტებით, აქტიურად გააგრძელებენ მუშაობას იმისთვის, რომ თანამდებობები დატოვონ იუსტიციის უმაღლესი საბჭოს იმ წევრებმა, რომლებმაც აქტიური მონაწილეობა მიიღეს უზენაესი სასამართლოს მოსამართლეთა სიის ნომინირებაში. მათივე თქმით, სამუშაო ჯგუფს, რომელიც უზენაესი სასამართლოს მოსამართლეთა შესარჩევად შეიქმნა, საზოგადოების ნდობა არ ექნება, რის გამოც მათი მხრიდან ამ ჯგუფში მათივე მონაწილეობის აუცილებლობას ვერ ხედავენ.