საკრებულოს სხდომაზე „ნაციონალური მოძრაობა" სატრანსპორტო კომპანიის უფროსის თანამდებობიდან გათავისუფლების საკითხს დააყენებს

საკრებულოს სხდომაზე ფრაქცია „ნაციონალური მოძრაობა" სატრანსპორტო კომპანიის უფროსის მამუკა კობახიძის თანამდებობიდან გათავისუფლების საკითხს დააყენებს. როგორც ფრაქციის წევრმა ლევან ხაბეიშვილმა აღნიშნა, კობახიძე ასევე ხელმძღვანელობს „ყაზტრანსგაზ-თბილისსაც" და ვერც ერთ მოვალეობას ვერ ასრულებს კარგად. ჟურნალისტებმა მას ასევე ჰკითხეს შეუერთდება თუ არა ალეკო ელისაშვილის დაანონსებულ აქციას "ყაზტრნსგაზთან", რაზეც ხაბეიშვილმა აღნიშნა, რომ თუ სადმე აქციაა გასამართი, ეს ადგილია თბილისის მერია.

„ოპოზიცია დღევანდელ სხდომაზე აპირებს სატრანსპორტო სამსახურის უფროსის, მამუკა კობახიძის თანამდებობიდან გაშვების საკითხი დააყენოს. წარმოუდგენელია ეს ადამიანი ორი შპს-ს ხელმძღვანელი იყოს, სადაც ათიათასობით თანამშრომელია თავმოყრილი. ვერც სატრანსპორტო სამსახურში მუშაობს ეს კაცი კარგად და ვერც „ყაზტრანსგაზ-თბილისში“, - განაცხადა ხაბეიშვილმა.