საბერძნეთის პარლამენტმა მაკედონიასთან შეთანხმება დაამტკიცა, რომელიც ამ ქვეყნის სახელის შეცვლას უკავშირდება და ჩრდილოეთ მაკედონია დაერქმევა. პარლამენტის დღევანდელ სხდომაზე გადაწყვეტილებას მხარი 153 დეპუტატმა დაუჭირა. გადაწყვეტილებას 146 დეპუტატი შეეწინააღმდეგა.

ჩრდილოეთ მაკედონიის პარლამენტმა ამ გადაწყვეტილებას კენჭი 11 იანვარს უყარა და მხარი დაუჭირა. საბერძნეთის პარლამენტის მიერ ჩრდილოეთ მაკედონიასთან დაკავშირებული გადაწყვეტილების რატიფიცირების შემდეგ, ნატოს გენერალური მდივანი იენს სტოლტენბერგი ამ ბალკანური ქვეყნის ალიანსში გაწევრიანებას ელოდება. ამის შესახებ მან „ტვიტერის“ პირად გვერდზე დაწერა. მისი თქმით, მოუთმენლად ელის, მომავალში რესპუბლიკა ჩრდილოეთ მაკედონია ალიანსის წევრი როდის გახდება.

ნატოში მიიჩნევენ, რომ ჩრდილოეთ მაკედონიის ალიანსში გაწევრიანება 2020 წლის გაზაფხულზე განხორციელდება.