საქართველოს საკონსტიტუციო სასამართლოს თავმჯდომარე ზაზა თავაძე და სასამართლოს წევრი ევა გოცირიძე ადამიანის უფლებათა ევროპული სასამართლოს მიწვევით სტრასბურგში იმყოფებიან. ამის შესახებ „ინტერპრესნიუსს“ საკონსტიტუციო სასამართლოდან აცნობეს.

მათივე ცნობით, ზაზა თავაძე და ევა გოცირიძე მონაწილეობენ ადამიანის უფლებათა ევროპული სასამართლოს სამუშაო წლის გახსნასთან დაკავშირებულ ღონისძიებებში. მათ შორის, დაესწრნენ სემინარს, რომლის ფარგლებშიც მართლმსაჯულებისადმი ნდობის გაძლიერების საკითხები განიხილეს.

ამასთან, ვიზიტის ფარგლებში საკონსტიტუციო სასამართლოს თავმჯდომარე შეხვდა ადამიანის უფლებათა ევროპული სასამართლოს მოსამართლეს საქართველოდან ლადო ჭანტურიას. ასევე, გაიმართა შეხვედრები ევროპის საკონსტიტუციო სასამართლოების წარმომადგენლებთან.