კრემლი არ გეგმავს ვენესუელას ოპოზიციის ლიდერთან ხუან გუაიდოსთან კონტაქტზე გასვლას, - ამის შესახებ რუსეთის პრეზიდენტის ოფიციალურმა წარმომადგენელმა დიმიტრი პესკოვმა ჟურნალისტებს განუცხადა.

„ჩვენ არ გვქონია მასთან კონტაქტი და რამდენადაც ვიცი, არ ვაპირებთ მასთან კონტაქტზე გასვლას“, - განაცხადა პესკოვმა.

მისივე თქმით, ოფიციალური მოსკოვი მხარს უჭერს იმ მიდგომას, რომ გარე ჩარევა არ უნდა მოხდეს ვენესუელას კრიზისის დარეგულირების საკითხში.

„ახლა მთავარია, რომ ვენესუელელებმა საკონსტიტუციო ჩარჩოს ფარგლებში თვითონ მოაგვარონ ის უთანხმოებები, რომელიც მათ შორის არსებობს და ერთადერთი რითიც დახმარება შეგვიძლია არის ის, რომ არ ჩავერიოთ არსებულ სიტუაციაში, რასაც ზოგიერთი ქვეყანა აკეთებს“, - აღნიშნა რუსეთის პრეზიდენტის პრესმდივანმა.