ევროკავშირი უნდა იყოს უფრო ჩართული საქართველოში სხვადასხვა მხრივ და საქართველო ევროპაში უნდა იყოს უფრო გამოჩენილი, - ამის შესახებ საქართველოს პრეზიდენტმა სალომე ზურაბიშვილმა დღეს გამართულ ბრიფინგზე განაცხადა.

მისივე თქმით, უნდა მოვითხოვოთ, რომ ევროკავშირის ფორმატებში წინმსწრებად შეიყვანონ საქართველო, სანამ წევრობაზე იქნება საუბარი.

„ევროკავშირი უნდა იყოს უფრო ჩართული საქართველოში სხვადასხვა მხრივ და საქართველო ევროპაში უნდა იყოს უფრო გამოჩენილი. ჩვენ ვართ იმ სამ ქვეყანას შორის, რომელსაც დღეს აქვს ასოცირების ხელშეკრულება და ამ სამი ქვეყნიდან უფრო წინ მდგომი ვართ სხვადასხვა გარემოებებიდან გამომდინარე. ჩვენ ეს სტატუსი მაქსიმალურად უნდა გამოვიყენოთ და ევროკავშირმა შეგვიქმნას პირობები, რომ მაქსიმალურად გამოყენებული იყოს ეს სტატუსი. ეს ნიშნავს, რომ უნდა მოვითხოვოთ, მოვილაპარაკოთ, რომ წინმსწრებად შეგვიყვანონ ყველა იმ ფორმატში, სადაც საქართველოს ადგილი არის და აღიარებუალია, სანამ წევრობაზე და კანდიდატობაზე გვექნება საუბარი. ამის მოდელები არსებობს, „ერასმუსში“ ვართ წევრი და გვითხრეს, რომ აქ მონაწილეობის ციფრებს გაზრდიან. „ერასმუსი“ სტუდენტებისთვისაა და ჩვენთვის ძალიან მნიშვნელოვანია“, - განაცხადა სალომე ზურაბიშვილმა.