„NDI-ის გამოკითხვაშიც ჩანს, რომ დღეს ჩვენთან უცვლელია ევროკავშირისა და ნატოს მიმართ განწყობა. ეს ის განწყობაა, რაც მე ბრიუსელში ჩავიტანე“, - ამის შესახებ საქართველოს პრეზიდენტმა სალომე ზურაბიშვილმა დღევანდელ პრესკონფერენციაზე განაცხადა. მისი თქმით, ევროკავშირის პირველი პირები საქართველოში ჩამოსვლაზე თანხმობას აცხადებენ.
„ევროკავშირის ყველა პირველი პირი თანხმობას აცხადებს საქართველოში ჩამოსვლაზე. მაგალითად, ევროსაბჭოს პრეზიდენტმა დონალდ ტუსკმა თანხმობა მომცა არა მხოლოდ ბათუმის კონფერენციაზე ჩამოსვლაზე, არამედ იმაზეც, რომ ოფიციალური ვიზიტი იყოს, რომელიც ჯერ თბილისში დაიწყება და შემდგომ ერთად ჩავალთ ბათუმში. ასევე იუნკერი, აგრეთვე კომისარი ბარნიე, რომელიც ბრექსითის საკითხებში წამყვანი ფიგურაა. მანაც გამოხატა ბათუმის კონფერენციაზე დასწრების სურვილი. ეს ყველაფერი ნიშნავს, რომ საქართველო ძალიან დაფასებულია და ევროკავშირის ინტერესებში მაღლა დგას, როგორც ერთ-ერთი ქვეყანა, რომელშიც ჯერ კიდევ შეიმჩნევა ევროენთუზიაზმი.
ეს NDI-ის გამოკვლევაშიც ჩანს, რომ დღეს ჩვენთან უცვლელია ევროკავშირისა და ნატოს მიმართ განწყობა. ეს ის განწყობაა, რაც მე ბრიუსელში ჩავიტანე. ევროკავშირსა და ნატოში ინტეგრაციის საკითხზე ქვეყანაში სრული კონსენსუსია“, - განაცხადა სალომე ზურაბიშვილმა.