შეფასებისა და გამოცდების ეროვნული ცენტრის ყოფილი ხელმძღვანელის მაია მიმინოშვილის განცხადებით, უმჯობესია სკოლის გამოსაშვებ და ეროვნულ გამოცდებზე დაგეგმილი სიახლეების შესახებ, კომენტარი მათ გააკეთონ, ვისაც ეს ცვლილება ყველაზე მეტად ეხებათ.
გამოცდების ეროვნული ცენტრის ყოფილ ხელმძღვანელს აღნიშნულ ცვლილებებთან დაკავშირებით კონკრეტული პოზიცია არ დაუფიქსირებია.
„დღემდე ამ ძალიან წარმატებული სისტემის შემქმნელებისგან მაქსიმალურად ობიექტური კომენტარიც შეიძლება მიკერძოებულად ჩაითვალოს, ამიტომ აჯობებს პირველი შეფასება მათ გააკეთონ, ვისაც ეს ცვლილება ყველაზე მეტად ეხება - სკოლებმა, უმაღლესებმა, მასწავლებლებმა, რეალურმა ექსპერტებმა, მოსწავლეებმა და აბიტურიენტებმა“, - განაცხადა მაია მიმინოშვილმა.
2019 წელს მე-11 კლასის გამოსაშვები გამოცდები გაუქმდება, 2020 წელს კი - მე-12 კლასისაც. ამასთან, 2020 წელს ერთიან ეროვნულ გამოცდებზე ზოგადი უნარების გამოცდა სავალდებულო აღარ იქნება.