შეწყალების კომისიის ახალ მოდელზე კონსულტაციები იუსტიციის სამინისტროსთან მიმდინარეობს, - ამის შესახებ საქართველოს პრეზიდენტის პრესსპიკერმა ხატია მოისწრაფიშვილმა პრესკონფერენციაზე „ინტერპრესნიუსის" მიერ დასმული კითხვის საპასუხოდ განაცხადა. როგორც მოისწრაფიშვილმა აღნიშნა, ახალი შეწყალების კომისია მაღალქმედუნარიანი იქნება.

„ამ ეტაპზე საქართველოს პრეზიდენტის ინიციატივით იუსტიციის სამინისტროსთან მიმდინარეობს კონსულტაციები და შეიქმნება სრულიად ახალ კონცეფციაზე დაფუძნებული შეწყალების კომისია, ეს კომისია აუცილებლად იქნება მაღალქმედითუნარიანი",- განაცხადა მოისწრაფიშვილმა.

რაც შეეხება კონკრეტულ კანდიდატებს, როგორც მოისწრაფიშვილმა აღნიშნა, ამ ეტაპზე არანაირ კანდიდატებთან დაკავშირებით საუბარი არ არის.

„ახლა მიმდინარეობს კონცეფციაზე მუშაობა, რომელსაც დაეფუძნება შეწყალების კომისიის ახალი მოდელი. მხოლოდ ამის შემდეგ უნდა ვისაუბროთ კანდიდატებზე",- განაცხადა მოისწრაფიშვილმა.