ხელისუფლება, რომელიც პირადი ცხოვრების ამსახველი კადრებით/ინფორმაციით მართავს ან აშანტაჟებს პოლიტიკოსებს ან საზოგადოების სხვა წევრებს, უნდა დასრულდეს, - ამის შესახებ ფრაქცია „ნაციონალური მოძრაობის“ დეპუტატმა თინა ბოკუჩავამ სოციალური ქსელით პირადი ცხოვრების ამსახველი ვიდეომასალის გავრცელებასთან დაკავშირებით გავრცელებული ინფორმაციის კომენტირებისას განაცხადა.

„პირადი ცხოვრებით მანიპულირება ჩვენ ქვეყანაში უნდა დასრულდეს. ივანიშვილისთვის ეს რუსეთში ნასწავლი და პუტინისთვის ჩვეული მართვის მეთოდია, ადამიანების კონტროლის, მათი დაშინებისა და მართვის.

ეს ბინძური მეთოდი მიუღებელი იყო გუშინ, მიუღებელია დღეს და მიუღებელი იქნება ხვალ, რაოდენ მწვავედ პერსონალურად თუ პოლიტიკურად დაპირისპირებულ პირს არ უნდა შეეხებოდეს ეს. ეს ჩვენ ყველას გვეხება და ამას ჩვენ არ შევეგუებით! მოვითხოვთ სწრაფ და ეფექტიან გამოძიებას და დამნაშავეების დასჯას კანონის სრული სიმკაცრით“, - განაცხადა ბოკუჩავამ.