საქართველოს ეროვნულ ოლიმპიურ კომიტეტში ხვალ, სპორტულ კლუბ „ბლექ თაიგერის“ ორგანიზებით, ქართული ძიუდოს ისტორიის შესახებ გადაღებული დოკუმენტური ფილმის, „ძველი კიმონოს“ პრეზენტაცია გაიმართება. ინფორმაციას სპორტული კლუბი „ბლექ თაიგერი“ ავრცელებს.
„ძველი კიმონო“ ძიუდოს კლუბების, ქართული „ბლექ თაიგერისა“ და ლატვიური „ლიდოს“ ერთობლივი პროექტია. ფილმის გადაღება 2016 წელს დაიწყო. პროექტი სრულად დააფინანსა ბიზნესმენმა დავით ხახუტაშვილმა.
„ძველი კიმონო“ ორი სერიისგან შედგება და საქართველოში ძიუდოს შემოსვლასა და განვითარების სხვადასხვა ეტაპს ეხება. ქართული ძიუდოს ისტორიის შესახებ, ოლიმპიური ჩემპიონები, წარმატებული მწვრთნელები და ქართული ძიუდოს განვითარებაში მონაწილე პირები საუბრობენ.
ფილმის ჩვენებას მოქმედი და ვეტერანი ძიუდოისტები, ძიუდოს მწვრთნელები, საქართველოს ეროვნული ოლიმპიური კომიტეტის წარმომადგენლები, მოწვეული სტუმრები ლატვიიდან, გერმანიიდან და უკრაინიდან, ასევე მედიის წარმომადგენლები დაესწრებიან.
თბილისის შემდეგ ფილმის ჩვენება საქართველოს სხვადასხვა რეგიონში შედგება.