თბილისის მერია დიღმის ჭალების პროექტის განხორციელებას გეგმავს, რისთვისაც 11 მილიონზე მეტი ლარი დაიხარჯება.
როგორც თბილისის მერმა კახა კალაძემ 2019 წელს დაგეგმილი ინფრასტრუქტურული პროექტების პრეზენტაციისას განაცხადა, დიღმის ჭალების პროექტი 2-წლიანია და მისი განხორციელება მიმდინარე წელს დაიწყება.
კალაძის ინფორმაციით, დიღმის ჭალების პროექტი ასახულია თბილისის გენგეგმაში და ახლო მომავალში ის იქნება ერთ-ერთი საუკეთესო გამწვანებული სივრცე, დასასვენებელი ინფრასტრუქტურით, სპორტული მოედნებით, ამფითეატრით და ასე შემდეგ.
“ჩვენ ეკოლოგიურ მდგომარეობაზე და მისი მოგვარების გზებზე ბევრს ვსაუბრობთ. ძალიან დიდ ყურადღებას ვაქცევთ რეგულაციების გამკაცრებას და მწვანე სივრცეების შექმნას. ერთი წლის განმავლობაში არც ერთი სამშენებლო ნებართვა მწვანე სივრცეებისა და სპორტული მოედნების ხარჯზე არ გაცემულა“, - აღნიშნა კახა კალაძემ.
გარდა ამისა, 2019 წელს, სოფელ დიღომის კანალიზაციის მოწყობის სამუშაოებისთვის 3-მილიონი ლარი დაიხარჯება.
იხილეთ ვიდეო: როგორი იქნება ახალი მწვანე სივრცე, რომელიც ე.წ. "დიღმის ჭალების" ტერიტორიაზე მოეწყობა