ჩემი აზრით, პოლიტიკა უნდა იყოს ბევრად უფრო მორალური, ვიდრე არის დღეს,- ამის შესახებ პარლამენტის იურიდიულ საკითხთა კომიტეტის თავმჯდომარის მოვალეობის შემსრულებელმა დავით მათიკაშვილმა პირადი ცხოვრების ამსახველი ფარული ჩანაწერების გავრცელებასთან დაკავშირებით განაცხადა. მისი თქმით, დაწყებულია გამოძიება და იკითხებიან ის ადამიანები, ვინც მომხდარის შესახებ ინფორმაცია გაავრცელეს.
"როგორც ჩემთვის ცნობილია, დაწყებულია შესაბამისი სისხლის სამართლებრივი პროცედურები. იკითხებიან ის ადამინები, ვინც ამის შესახებ ინფორმაცია გაავრცელეს. სიმართლე გითხრათ, მე თვითონ ასეთი რაღაც არ მინახავს, მაგრამ არის ამის შესახებ განცხადება, არის ამის შესახებ მოკვლევა და გამოძიება. რა თქმა უნდა, თვითონ სამწუხარო ფაქტია. ჩემი აზრით, პოლიტიკა უნდა იყოს ბევრად უფრო მორალური, ვიდრე არის დღეს. ეს ეხება აბსოლუტურად ყველას", - განაცხადა მათიკაშვილმა.
შეგახსენებთ, რომ გავრცელებული ინფორმაციით, საპარლამენტო უმრავლესობის წევრ ეკა ბესელიასთან დაკავშირებით სოციალურ ქსელში პირადი ცხოვრების ამსახველი ჩანაწერი გავრცელდა. ეკა ბესელია ამ თემაზე საგამოძიებო ორგანოებს რეაგირებისკენ მოუწოდებს.